Situada no bloco ocidental do país, limita a norte com as comarcas de Ordes e Marinhas, a leste com a Terra de Melide, a sul com o Deça e a oeste com Compostela.

A comarca situa-se no interflúvio Tambre-Ulha, dividido polos Montes do Bocelo; caracteriza-se por relevos relativamente suaves que mostram a transiçom para a Galiza oriental desde as terras da dorsal galega; conserva importantes massas de arvorado autóctone e bosques de ribeira; a dedicaçom agro-gadeira extendeu o espaço de prado, e nas últimas décadas, o monocultivo eucalipteiro empobreceu o bosque.

Foi berço dos Cóporos e os Célticos Supertamáricos, segundo narram os cronistas romanos. A pesquisa recente comprovou que ainda hoje podemos relacionar boa parte das parróquias com castros galaicos. Situada na via XIX, e até dia de hoje artéria dumha importante linha de comunicaçom galega, os romanos instalárom o campamento militar ‘Brevis’ para controlar a exporaçom de minas de ouro na bisbarra. A capital de comarca, Arçua, nasce em tempos medievais, com a intençom de assistir a peregrinas e peregrinos.

Na Idade Contemporánea, foi das poucas comarcas da Galiza que acolheu importantes focos de carlistas. Várias décadas mais tarde, Arçua foi o lugar de detençom por parte dos golpistas do alcalde-mártir de Santiago Ánxel Casal, cujas raízes familiares estavam no lugar de Pela, em Vilantime.

A continuidade de práticas históricas da comarca regista-se em santuários como Da Monta, da Fonte Santa ou de Sam Joám de Navas, ao pé de carvalheiras, que acolhem romarias que possivelmente cristianizaram velhos cultos.

Desde há séculos, a comarca é afamada pola produçom de queijos de Arçua-Ulhoa, produto realizado tradicionalmente polas mulheres do lugar. Esta sona  vê-se  acrescentada  desde 1975, com a celebraçom da Festa do Queijo cada mês de março, evento cultural que vai além do gastronómico.

Acidentes geográficos:

Serras: Montes do Bocelo.

Picos: Pico do Pilar, Cornado, Filgueira.

Rios: Tambre, Ulha, Brandeso, Iso.