Ti dís: Galicia é ben pequena. Eu dígoche: Galicia é un mundo. Cada terra é como si fora o mundo enteiro. Poderála andar en pouco tempo do Norte pra o Sul, do Este pra o Oeste noutro tanto; poderála volver andar outra vez e máis: nona has dar andado. E de cada vez que a andes, has atopar cousas novas e outras has botar de menos. Pode ela ser pequena en extensión; en fondura, en entidade, é tan grande como queiras, e dende logo, moito meirande de como tí a ves. […]
Do grandor do teu esprito depende todo; canto máis pequeno sexa, máis terra precisará. Si o teu pensar é fondo, a túa terra, pra tí, non terá cabo, nela estará o mundo con tódolos seus climas. Si o teu pensar se detén na códia das cousas, non digas tampouco: Galicia é ben pequena; és tí, que endexamáis poderás concebir nada grande.
-Vicente Risco