Situada no sul do país, limita a norte com a comarca de Terra de Cela, a leste com a da Límia e a sul e a oeste com Portugal.

Esta comarca conforma a zona mais meridional da nossa Terra, e fai parte da chamada ‘Raia Seca’ entre Galiza e Portugal. Organiza-se arredor dumha rede de mui pequenas vilas e combina características do clima continental com umha clara influência mediterránea, o que dá umhas condiçons ambientais e produtivas muito especiais. Topamos desde zonas de cultivo de vinho a enormes formaçons de tojos e uzes, passando por pasteiros nos cúmios ou queirogais atlánticos. Nos vales e ribeiras, as carvalheiras e o bosque ribeirinho som dominantes.

A comarca acolhe o Parque Natural da Baixa Límia-Serra do Xurês, catalogado aliás como Zona Especial de Conservaçom e Zona de Especial Protecçom para as Aves. Trata-se do parque natural galego mais amplo e de maior altitude, e inclui três importantes serras: o Laboreiro, o Xurês e a Pena. Decorre de norte a sul e vai desde os vales da Límia até os altos Baixa Límia.

Como boa parte da Galiza interior, a Baixa Límia foi agredida ambientalmente com a construçom de grandes barragens, caso de Lindoso.

Neste território habitava a tribo Querquenna, submetida polas tropas de Décimo Júnio Bruto após cruzar o Límia, que para os soldados romanos era considerado como Lethes ou rio do esquecimento. A pegada da conquista ficou em forma do campamento ‘Aquis Querquennis’, galeguizado logo como ‘A Cidá’. Na sua proximidade acha-se o balneário d’o Banho, conhecido polas suas propriedades medicinais. 

A destacar Olímpia Valéncia, natural de Bande 1898, primeira galega titulada em Medicina. Ginecóloga que tivo que enfrentar-se a dificuldades durante décadas para ejercer por ser mulher.  Com grandes inquedanças culturais e detida por formar parte do Partido Galeguista. Encabeçou no 31 o chamamento à candidatura galeguista da província de Ponte Vedra e no 36 a campanha em prol do sim no Plebiscito do Estatuto de Autonomia de Galiza.

Acidentes geográficos:

Serras: Laboreiro, Xurês, Santa Eufémia.

Picos: Pico da Nevosa, Sobreira, Fonte Fria, Galheiras.

Rios: Límia, Salas.

Vales: Vale de Couso, Vale de Salas